hamein ishwar ne do haath diye hain, daan dene ke liye
isiliye humein dene me jo anand ata hai vo kisi se kuch maangne me nahin

Sunday, 14 September 2014

Mata ko nariyal ka bhent [why is coconut offered to God]



Ye katha un dino ki hai, jab Bharat me Mughal Samrat Akbar ka shaasan tha. Mata ka ek param bhakt Dhyanu, apne sang sahit Jwala Maa ke darshan ke liye ja raha tha. Itna bada sangh dekh kar Akbar ke sipahiyon ne Chandni Chowk me unhe rok liya aur Badshah ke darbar me le ja ke pesh kiya. Badhah ne Dhyanu bhakt se puchha "Itne logon ke sath tum kahan aur kyun ja rahe ho?"

Dhyanu ne hath jod uttar diya "hum log Mata ke bhakt hain aur Jwala Mai Shaktipeeth ke darshan ko ja rahe hain". Akbar ne Devi maa ka virodh karte hue kaha "Ye Devi Mai kaun hai aur unke darbar ja ke kya hoga?"Bhakt Dhyanu ne kaha "Jwala Mai sansar ki rachna evam palan karne wali mata hain. apne bhakton par sadaiv unki kripa rehti hai tatha sachhe man se ki gyi prarthana vo sweekar karti hain aur unki manokamna puri karti hain". Akbar ne kaha"hum yakeen kaise karen? Tum bhakt ho to apni maa se keh kar koi chamatkaar dikhao."

Dhyanu ne kaha "hum mata ke tuchh sevak hain aur bhala hum kya chamatkaar dikha sakte hain?" ye sunkar Akbar ko krodh aa gaya aur usne sangh ke pas jo ghode the unme se ek ki gardan katwa di, aur kaha "apni ma se kaho ki ghode ki gardan ko jod, use wapas jeevit kar den. Hum unka chamatkar dekhna chahte hain."

Bhakt Dhyanu ne Badshah se kaha "Maharaj! ek maah tak ap mere ghode ke dhad ko sir samet surakshit rakh den." Ek mahine ki mohlat lekar, usne Ma ke darbaar jaane ki anumati bhi li. Dhyanu apne sathiyon sahit Maa Jwala ke darbaar pohcha. Snan pujan karne ke upraant, raat bhar maa ke mandir me jagran kiya. Pratah kaal arti ke samay hath jod Dhyanu ne man se prarthna ki "Hey maiya! ap antaryami  hain. Badshah meri bhakti ki pareeksha le rahe hain. Meri laaj rakho maa aur mere ghode ko apni kripa se jeevit kar do. Anyatha mai bhi apna sheesh kaat apke charno me chadha dunga kyunki mai lajjit hokar jeena nahi chahta.

Thodi der tak maun re ke maa ke taraf dekhta raha, fir usne apna sheesh kaat kar Devi Maa ke charno me chadha diya. Usi samay Maa prakat huin aur bhakt ka sheesh dhadh se jud gaya. Maa ne kaha "Putra! tumhare ghode ko bhi maine jeevit kar diya hai. aur kuch ichha hai to vardaan maang lo".
Bhakt Dhyanu ne kaha "Maa!aap jagat mata hain. apne bhakt ki itni kathin pariksha na len. har bhakt apko apne sheesh ka bhent nahi de sakta, isliye bhent ke liye kuch anya vastu ko ap sweekar karne ki kripa karen". Maa ne kaha " mai abse sheesh ke sthan par nariyal ka bhent tatha sache man se ki prarthana dwara hi bhakt ki manokamna puri karungi." Yeh kehkar Maiya antardhyan ho gyin.

Idhar Badshah Akbar ghode ko jeevit dekh kar hairan tha. Usne apne kuch sipahiyon ko is chmatkar ke raaz ka pata karne ke liye Jwala Ji bheja. Vapas laut kar unke sipahiyon ne bataya ki zameen ke andar se roshni ki lapten nikal rahi hain. yadi ap hukm den to band karva den. Akbar ne sweekriti de di. Shahi sipahiyon ne sarva pratham Mata ki pavitra jyoti par lohe ke mote mote tave rakhva diye, parantu divya jyoti tava faad kar upar nikal ayin. iske pashchaat pani ke jharne se lagatar divya jyot ko bujhane ki cheshta ki gyi. Fir bhi jyot ka prakash kam na hua. haar kar shaahi sipahiyon ne badshah ko khabar di ki unki sari koshishen naakaam ho gyin aur Jyot abhi bhi jal rahi hai. ab ap jo theek samjhen karen.

Is samachaar ko pakar, Akbar ne darbar ke vidwan brahmano se salaah ki. Brahmano ne unhe khud jakar Maa ke chamatkaar ko mehsoos karne ka tatha Devi maa ko bhent chadhake prasann karne ka sujhaav diya. Akbar bhent ke roop me sawa man sone ka chhhatra leke Ma Jwala ke darbar nange paon pahuncha. Maa ki divya jyoti ke darshan kiye aur shraddha se Maa ke charno me apna mastak jhuka kar naman kiya. apne kiye par pashchataap use ho raha tha. sone ke chhatra ko chadhaane ki taiyyari hone lagi. parantu chhatra girkar toot gaya. kaha jata hai ki vo chhatra sone ka na raha, kisi vichitra dhaatu ka ban gaya, jo na to loha tha, na peetal, tamba aur na sheesha hi tha. Devi maa ne bhent ko asweekaar kar diya. Akbar ne Mata se shama ki bheek mangi. Badhshah dwara chadhaya gaya vah khandit chhatra, Jwala Mai ke darbaar me aj bhi rakha hua dekha ja sakta hai.

Boliye prem se....Sanche darbaar ki Jai. Jwala Mai ki jai.

Friday, 15 August 2014

Radha Krishna Vivah Katha


Dwapar yug me Bhagwati Radha aur Bhagwan Shri Krishna ka gathbandhan vasant panchmi ko hua tha, par kalyug me bhi yahi tithi ShriRadha-Shyamsunder ke milan ki sakshi bani. Is kathanak ka saar sanshep yeh hai ki 16vin shataabdi me Paschchim Bengal ke Medinipur Jile ke Dhaarenda gaon me janme Krishnadas apne guru se deeksha praapt karne ke baad Vrindavan jakar vahin rehne lage.

Ek roz Shri Radha-Krishna ki nitya raas sthali ke safai ke dauraan, unhe durlabh ratnon se jadit ek nupur mila. Krishnadas ji ko aisa laga ki yeh alaukik nupur Bhagwati Radharani ka hai. Radharani ko jab yeh baad maloom hui, to unhone apni sakhi Lalita ko vah nupur laane ko bheja. Lalita ji vridh Brahmani ka vesh dhar ke Krishndas ji ke sameep aain aur unhone nupur lautaane ka agrah kiya.

Krishnadas ne kaha "Mai yeh nupur seedhe uski swamini ko hi saupunga". Darasal veh Bhagwati Radha ke darshanon ke liye aatur the. Fir Radhaji ne unki ichha purti  ka nirnay liya. Radharani ke nirdesh par Lalita ji ne Krishnadas ko Radha mantra pradaan karke unhe Radha kund me snaan karvaya. Isse krishnadas ji ko Radharani ke darshan ki patrata praapt ho gayi, lekin darshan ke baad Bhagwati Radha se viraah ki kalpana karte hi Krishnadas ka man dukhi ho gaya.

Radhaji ne unhe saantwana dene ke liye apne hriday se Shree Shayamsunder ka shrivgrah prakat karke Lalita ji ke maadhyam se Krishnadas ji ko saunp diya. Prabhu ke is vigrah ka avirbhaav 1578 me vasant panchmi ko hua tha. Iske baad 1580 me Bharatpur riyasat ke tatkaleen raja ne apne khazane me prakatit Shyama (Radharani) ke shrivigrah ka vivah Vasant panchmi ke shubh muhurat me Vrindavan jakar Shri Shyamsunder ji ke saath karva diya. Unhone vahin par Shri Radha-Shyamsunder ke liye ek vishal mandir ka bhi nirmaan karaya.

Shri Krishnadas ke mahaprayan ke baad unke parampriya shishya Shreersikanand ne Shyama-Shyamsunder ki sewa ki. Vigat char shatabdiyon se Shreersikanand prabhu ke vanshaj Laal-lali (Shyam sunder-Radharani) ki puja-sewa tatha mandr ki vyavastha karte chale aa rahe hain. Pratyek varsh vasant panchmi ke din Shri Shyamsunder dev ka avirbhaavotsav tatha Shri Radha-Shyamsunder ka Vivahotsav atyant bhavya roop se manaya jaata hai. Isme asankhya shraddhaalu sammilit hote hain. Isliye Vasant Panchmi Shyamsunder Panchmi ke naam se prasidh ho gyi.



(Article by Sandhya Tandon, Jagran sakhi, February 2014)

Monday, 4 August 2014

Shri Krishna Lori







Maiyaa Yashoda apne Kanhaiya ko sula rahin hain, parantu  natkhat Kanhaiya ko nind nahi aa rahi hai, isliye Yashoda ji tarah tarah se jatan karti hain,  kabhi thapki deti hain, toh kabhi lori sunati hain, kabhi Kanhaiya ko dikhane ke liye swayam sone ka abhinaye karti hain, jisse Kanhaiya so jaye ,lekin Kanhaiya kabhi sote hain toh kabhi ankhein khol dete hain.

Maha kavi "Surdasji" is drishya ka varnan apne pad me is prakar karte hain:



        Yashoda hari paalne jhulave ri
Yashoda hari paalne jhulave ri
Halrave, dulraye,malhave ri
joyi soyi kachu kachu gaave
Yashoda hari paalne jhulave ri -2

Mere lal ko aao nindniya
kahe na aani suaave
tu kaahe na vegi si aave
toh ko kanha bulaave
Yashoda hari paalne jhulave ri -2

kab hun palak hari moondi let hain,
kab hun adhar farkave,
sovat jani maon ho rahin,
kari-kari shayan batave,
Yashoda hari paalne jhulave ri -2

yehi antar akulaaye uthe hari,
jasho mati madhur gaave,
jo sukh sur amar muni durlabh,
so nand bhamini paave

Yashoda hari paalne jhulave ri
Halrave, dulraye,malhave ri
joyi soyi kachu kachu gave
Yashoda hari paalne jhulave ri -2


                  
                
                                       

Tuesday, 8 October 2013

Maa Durga ke 108 naam (Maa Durga's 108 names)


  1. Sati
  2. Saadhwi
  3. Bhavpreeta
  4. Bhavani
  5. Bhavmochini
  6. Arya
  7. Durga
  8. Jaya
  9. Aadya
  10. Trinetra
  11. Shooldhaarini
  12. Pinaakdhaarini
  13. Chitra
  14. ChandhraghanTa
  15. Mahatapa
  16. Mann
  17. Buddhi
  18. Ahankaara
  19. Chittaroopa
  20. Chitaa
  21. Chitii
  22. Sarvamantramayee
  23. Satta
  24. Satyaanandswaroopini
  25. Anantaa
  26. Bhaavini
  27. Bhaavya
  28. Bhavya
  29. Abhavya
  30. Sadaagati
  31. Shaambhavi
  32. Devamaata
  33. Chinta
  34. Ratnapriyasada
  35. Sarvavidya
  36. Dakshakanya
  37. Dakshayagyavinaashini
  38. Aparna
  39. AnekvarNaa
  40. PaaTla
  41. PaaTlavanti
  42. PaTTaambarpareedhaana
  43. Kalmanjeer-Ranjini
  44. Ameyavikramaa
  45. Kroora
  46. Sundari
  47. Sursundari
  48. Vandurga
  49. Maatangee
  50. Matangamunipoojita
  51. Brahmee
  52. Maaheshwari
  53. Ayndree
  54. Kawmaaree
  55. Vaishanavi
  56. Chamundaa
  57. Vaaraahee
  58. Lakshmi
  59. Purushakriti
  60. Vimla
  61. Utkarshini
  62. Gyana
  63. Kriya
  64. Nitya
  65. Buddhida
  66. Bahula
  67. Bahulapreta
  68. Sarvavahanvahanaa
  69. Nishumbhshumbh-hanani
  70. Mahishasurmardini
  71. MadhukaiTavhantri
  72. ChanDamunDa-vinashini
  73. Sarvasur-vinaasha
  74. Sarvadaanav-ghaatini
  75. Sarva-shaastra-mayi
  76. Satya
  77. Sarvaastra-dhaarini
  78. Anek-shastra-hasta
  79. Anek-astra-dhaarini
  80. Kumaari
  81. Ek-kanya
  82. Kayshori
  83. Yuvtee
  84. Yati
  85. Apraudha
  86. Praudha
  87. Vridhamaata
  88. Balprada
  89. Mahodari
  90. Muktakeshi
  91. Ghor-rupa
  92. Mahabala
  93. Agnijwala
  94. Rodramukhi
  95. Kaalraatri
  96. Tapaswini
  97. Narayani
  98. Bhadrakaali
  99. Vishnumaata
  100. Jalodari
  101. Shivdooti
  102. Karali
  103. Ananta
  104. Parmeshwari
  105. Kaatyayini
  106. Saavitri
  107. Pratayaksha
  108. Bhramavaadini

Saturday, 28 September 2013

Navdurga aur unki Shaktiyaan [Understanding Nine days of Navraatra]

Yaa Devi Sarvabhooteshu, Shakti rupenn sansthitha |
Namastasya Namastasya Namastasya Namo Namah ||

Arthaat jo devi sab prakaar ke praaniyo ke shakti roop mein avtarit ho,  unko mera baaram baar namaskaar hai, namaskaar hai, namaskaar hai. 

Sarv shrishti ko janm dene waali akhand mandalakaar jagan maata aadi shakti paar brahma swaroop hain. Maa nirgun swaroop hain. parantu unhe kisi bhi roop mein samay samay par dharam ki raksha tatha dushton ke vinaash ke liye saakaar roop lena padta hai.

Isi aadi shakti ne samay samay par Paarvati, Durga , Kaali , ChanDi aadi nav avtaar dhaaran kiye hain. Brahma , Vishnu tatha Shiv ji jo kramshah shrishti nirmaan, paalaan tatha sanhaar karne waale hain. Maata aadi shakti samasva charaachaar jagat mein oorja shakti roop mein vidyamaan hain. Yeh oorja shakti ke kaaran hi tamaam grah pind ulkaayein tatha tara samooh sthir evam chalayemaan hain. Aisa kuch bhi nahi jisme maa vidyamaan nahi, aur yeh ek antim satya hai ki pratyek drishya yaa adrishya sthal , sthaan , vastu se lekar pratyek bhautik vastuon mein maa vidyaamaan hain. 

Aaj vaygyaanik drishtikon se bhi dekhein to brahmaand mein apaar oorja aur shakti ki vishaal pranaali hai, jiske sahaare bhaari se bhaari kaarya, gati maan kiye jaa sakte hain. Is gatimaan jagat mein maanav bhi ek ekaai maatra hai jo ki brahmaand ki sanchaalika devi ki pratibimbit chaya se utpann hota hai. Devi ke dwara hi samasta charaachar padarthon par praano ka sanchaar hota hai tatha usi prakriya mein wo nashta bhi hota rehta hai. Atah, is nashwar sansaar mein chetna roop mein prakat hone se devi ko chitta swaroopini maana jaata hai. Vedon mein kaha jaata hai Devi Shakti amar ajanmaa aur avinaashi hain. Wohi aadi hain, wohi anth hain , wohi anant bhi hain.

Durga Sapt-Sati ke doosre adhyaay mein devi ke is swaroop ka vistrit varnan milta hai. Asuron ke atyachaar se trastha hokar devtaon ne jab Brahma ji se sahayata maangee to , Brahma ji ne kaha, " Detyaraaj ko var prapta hai ki uski mrityu kisi kuvaari kanya ke haath se hi hogi". Ispar sab devtaon ne upaaye swaroop sammilit hokar apne tej se devi ke is roop ko prakat kiya. Vibhinn devtaon ke deh se nikle hue tej se Devi ke vibhinn ang bane.

Bhagwan Shankar ke tej se Devi ka mukkh prakat hua, yamaraj ke tej se mastak ke kesh , Vishnu ke tej se bhujaayein, Chandrama ke tej se stan , Indra ke tej se kamar, Varun ke tej se jangha, prithvi ke tej se Nitamb, aur Brahma ke tej se dono charan , Surya ke tej se pairon ke ungliyan, Vasu ke tej se dono haath ki ungliyan, Prajapati ke tej se saare daant, Agni ke tej se dono netra, Sandhya ke tej se dono bhawein, Vaayu ke tej se kaan aur anya devtaon ke tej se devi ke bhinn bhinn ang bane.

Shivji ne us maha shakti ko apna trishul diya, Lakshmi jee ne apna kamal ka phool, Vishnu ji ne gada , Agni ne shakti, Vaayu ne Dhanush tatha baano se bhara tarkash, Yamraj ne chamatkaari danD, Kaal ne talwaar, Vishwakarma ne nirmal pharsa, Prajapati ne sphaTik maniyo ki maala, Varun ne divya shankh, Sheshnaag ne maniyo se sushobhit naag , Indra ne Vajra, Krishna ji ne apna Chakra, Varun dev ne paash, Brahma ji ne chaaron Veda, tatha Himalaya parvat ne savaari ke liye singh aur anek prakaar ke ratna pradaan kiye. Iske atirikta Samudra deva ne kabhi na maila hone wala ujwal haar tatha kabhi na phatne waale divya vastra , chooDamani, do kunDal, haathon ke kangan, pairon ke nupur , tatha angoothiyan bhet kiya. Kuber ne madira se bhara hua paatra diya. In sab vastuyon ko Devi ne dhaaran kiya. Is prakaar Maa Bhagwati ne sabhi devtaon se susamaanit ho Shakti swaroopani Durga ka roop dharaN kiya.


Navdurga Maa



Maata ke nau (9) roopon ka Varnan

Navdurga nau prakaar kee adhyatmik shaktiyaan hain. Aadi shakti mahadevi ne dushton ke vinaash ke liye devtaon ki prarthana par nau roop dhaaran kiye. Aaj bhi Bharat ke vibhinn shaktipeethon mein nau Durgaon ki moorthiyan vidyamaan hain. Durga kee inhi nau moorthiyan , yaani nau adhyatimik shaktiyion ke vibhinn nau naam is prakaar hain.


1. Shail Putri 

Shailputri ne maharaj Himalaya ki putree ke roop mein janm lekar Bhagwaan Shankar ka varan kiya aur vishwa kalyaan ke liye sarva deviyon ka maarg darshan kiya, tatha Ganesh evam Karthikeya jaise vidwaan putron kee maata bani. Inhee ke naam se pratham navraatra ka poojan aaj bhi vidhivat hota hai.
  • 2. BrahmaChaariNi
Devi BrahmachaariNi ne sansaar ko pavitra vaatsalya evam prem ka sandesh diya. Navraatra ka doosra din inhi devi ke naam se poojit hota hai. 

3. ChandraghanTa

Teesri devi ChandraghanTa ke roop mein prakat huin. Prithvee par nyaya neeti ki sthapana ke neeyam banaye. ChandraghanTa devi ke mastak par ardhachandrama ka chinnha ankit rehta hai. Navraatra ke teesre din inki pooja hoti hai. 

4. KushmaanDa

Chauthi devi KushmaanDa ne vishwa vyavastha ka bhaar uthaya, isliye inhe rozgaar kee devi bhi kaha jaata hai. Navraatra ka chauthe din mein KushmaanDa maata ki pooja hoti hai.

5. Skandamaata

Paachvi devi Skandamaata hain. Unhone sarv char aur sthir jeevon ko sochne aur samajhne ki shakti pradaan kee hai. Navraatra ka paachva din skandamaata ke naam poojit hota hai.

6. Kaatyaayini

Chathi devi Kaatyaayini hain. Inhone anek baar dushton ka sanghaar kiya tatha saadhu aur sajjano ki prathishtha ko kaayam rakha. Navraatra ke chathe din maa Kaatyayini ki pooja hoti hai.

7. Kaalraatri

Saatvin devi Kaalraatri hain. Jinhone Kaali ka roop dhaaran kar Raktabeej jaise raakshas ka vadh kiya. Navraatra ka saatva din inhi devi ke poojan se juda hai. Raakshaso ke sanghaar ke liye Kaalraatri yaani raatri kaal mein vikat sanghaar karne ka maa ne beeda uthaya hai.

8. Mahagauri

Aathvi devi ka naam Mahagauri hai. Unki savari sher hai. Unki ashta bhujaayein hain. Unhone Durjeya raakshas ka vadh kiya. Ashtami ki raat Maa Gauri ke naame vishesh poojya hai.

9. Siddhidaatri

Naumi devi Siddhidaatri hain. Har tarah ke tantra mantra evam gyaan kautuk ki bhandaar devi Siddhidaatri ko navraatra ke naumi ko pooja jaata hai.




Thursday, 26 September 2013

Sharan Me Aaye (bhajan)



Sharan me aaye hain... hum tumhaare
Dayaa karo hey...dayaalu bhagwan

Jo tum pita ho, to hum hain baalak
Jo tum ho swaami, to hum hain sewak
Jo tum ho thaakur, to hum pujari
Jo tum ho daata, to hum bhikhari
Tumhaare hokar hain hum bhikhari
Dayaa karo hey...dayaalu bhagwan

Naa hum me bal hai, na hum me shakti
Na hum me saadhan, na hum me bhakti
Tumhaare hokar hin hum dukhari
Dayaa karo hey dayaalu bhagwan

Sharan me aaye...hain hum tumhaare
Dayaa karo hey...dayaalu bhagwan

Bhale hain to, hain hum tumhare
Bure bhi hain to, hain hum tumhare
Tumhaare hokar hain hum bhikhari
Dayaa karo he dayaalu bhagwan

Sharan me aaye hain... hum tumhaare
Dayaa karo hey...dayaalu bhagwan

..................................................................