hamein ishwar ne do haath diye hain, daan dene ke liye
isiliye humein dene me jo anand ata hai vo kisi se kuch maangne me nahin

Tuesday, 23 April 2013

Krishna Aur Sudaama Ki Mitrata


Sudaama ji Shree Krishna ji ke bachpan ke mitra the.Sudaama brahman putra the aur shree krishna mathura ke rajkumaar the parantu dono hi Sandeepani rishi ke aashram mein saath saath shiksha grehan karte the. Dono mein atoot prem tha. Padhai samapt kar dono apne apne ghar chale gaye.

Ek baar patni ki iccha se, Sudaama ji, Krishna Ji se milne Dwarka gaye. Unki patni Susheela ne padosi se maangkar kuch chawal Krishna ko bhet swaroop dene ke liye Sudaama ji ko de diya tha. Nirdhan hone ke kaaran Shri Krishna ko dene ke liye Sudaama ji ke paas kuch bhi nahi tha.

Raaste mein, Sudaama ji chalte chalte thak kar ped ke neeche so gaye, jaagte hi Sudaama ji ashcharya hua ki Dwarka nagari aagayi hai.Neend mein hi Shree Krishna ne Sudaama ji ko Dwarka pahucha diya tha. Jab wo dwarpaal se pooche ki Dwaraka nagari yehi hai, to dwarpaal ne unhe bataya ki Dwarka nagari wohi hai. Unhone dwarpal se kaha, " Bhai, mujhe shree Krishna se milna hai, jaakaar sandesha de do". Dwarpaal unki deen heen haalat dekhkar poocha, " aap kaun hain , kahan se aaye hain aur Shree Krishna se aapko kyun milna hai". Tab Sudaama ne kaha, "mein unka mitra hoon. Mera naam Sudaama hai, aur mein Vrindavapuri se aaya hoon. Aap jaakar bata dijiye". Dwarpaal ko bohot aascharya hua, fir bhi wo Krishna ji ko usi pal batane gaya. Shree Krishna ji se dwarpal  ne kaha, " Prabhu dwar par ek atyant gareeb brahman aaya hai, tan par vastra nahi hain, dhoti bhi jagah jagah se phati hui hai, sir par topi  nahi , paon mein joota bhi nahi hai. Gareebi ke kaaran shareer bhi , jhukha hua hai. Apna naam Sudaama batlaata hai , tatha, kehta hai ki wo aapka bachpan ka mitra hai".

Sudaama naam sunte hai, prabhu atyant sheeghra dwar ki aur daud pade. Aaadar sahit unko bhavan mein laakar, apne aasan par baithaaya. unki haalat dekh kar, prabhu ke aakhon se aasoon behne lage. Wo apne aasoon se sudaamaa ke charan dhone lage, aur baar baar kehne lage , "mitra Sudaama, tumne  apni ye kya haalat bana li. Itne dino tum kahan the, kyun nahi mujhse milne aaye?"
Shree Krishna ne Sudaama ko gale se lagaakar, unko naye naye vastra pehnaaye, bhojan karwaya aur bachpan ki yaadoon mein dono mitra khoo gaye.

Shree Krishna ne kaha,"Mitra aapki bhabhiyan aapke darshan kar aapka aashirwaad lena chahtee hain". Sudaama ne kaha, "haan haan, unhe bulaayiye". Itna kehna tha ki bhabhiyon ki kataar lag gayi. Sudaama ji sabko aasheesh dene lage, parantu ab unke haath thakne lage the.Unhone Krishna se poocha, "Mere Bhai ab aur kitni bhabhiyan shesh hain?". Shree Krishna ne  muskuraate hue Sudaama ke kaan mein kaha, " poore 16108 bhabhiyan hain, jinme abhi aadhi hi pahuchee hain". Sudaam ji ke hosh ud gaye, unhone ne kaha, "mein un sab bhabhiyon ke badle, aapko hi aasheesh de deta hoon, meri bhabhiyon ko aasheesh swayam hi mil jaega". Krishna ji ne hass kar kaha, " haan yehi theek rahega." Fir vinod karte hue Sudaama ji se pooche,
"mitra tumhari shaadi ho gayi hai kya?" Sudaama ne kaha, " Haan, aapki bhabhi ka naam Susheela hai". Prabhu ne ulaana dete hue kaha, "Mitra, tumne mujhe shaadi mein kyun nahi bulaaya?". Sudaama ji muskuraate hue bole, " Haan mitra mujhse badi bhool hui, parantu ye bhool meine ek hi baar kiya. Aapne 16108 baar vivah rachakar, mujhe kitni baar nimantran bheja". Krishna ji sharma gaye , isi tarah dono mitra vinod karte rahe, aur bachpan ki baatein yaad karte rahe.

Krishna ne Sudaama se poocha, " Bhabhi ne mere liye, kya bhet bheji hai?" Sudaama ji sakuchaane lage. Krishna ne dobaara poocha, " Bhabhi ne kuch to bheja hi hoga?" Kyunki unhone Sudaama ke paas ek potli dekhi thi, jo bohot der se Sudaama chupaane ki koshish kar rahe the. Sudaama ji mehel  ki thaat baat evam Shree Krishna ki patniyon ke saaamne potli Krishna ko nahi dena chahte the. Krishna ji ne potli Sudaama ji se le li aur prem se potli mein rakha chawal khaane lage. Do mutthi chaawal khaate hi, unki patni Rukmani ne haat pakad liya aur prabhu se kaha, " Bhabhi ka bheja chawal sabhi swayam grahan karenge ya hamare liye bhi kuch bachayenge?" Antarman mein unhone ne prabhu se aagrah kiya, " Prabhu do mutthi chawal ke badle do lok  aapne unhe daan mein de hi diya hai. Ab kya samast brahmaand bhi apni mitra ko de denge?" 
Baaki bache hue chawal ko Rukmani ji ne samast raaniyon mein baatkar, swayam bhi prem se bhog lagaya.

Is tarah do mutthi chawal ke badle samast swargiya aishwarya tatha apne hi jaisa Dwarka puri ka bhawan banwakar Sudaama ji ka soya bhagya prabhu ne jagaya tha, aur atoot mitrata ka uccha udaharan bhi diya tha.

No comments:

Post a Comment